ಬಂಜಾರ ಸಮಾಜದ ಹೆಮ್ಮೆಯ ಸಾಂಸ್ಕೃತಿಕ ಹಬ್ಬ – ದೀಪಾವಳಿ | ನಾಗಾವಿಯ ಘಟಿಕಾ ಸ್ಥಾನದಲ್ಲಿ ಬಂಜಾರ ಯುವತಿಯರಿಂದ ಸಂಭ್ರಮ
ನಾಗಾವಿ ಎಕ್ಸಪ್ರೆಸ್
ಚಿತ್ತಾಪುರ: ಬಂಜಾರ ಸಮಾಜದ ವಿಶಿಷ್ಟವಾದ, ಐತಿಹಾಸಿಕ ಹಾಗೂ ಸಾಂಪ್ರದಾಯಿಕ ಹಬ್ಬಗಳಲ್ಲಿ ದೀಪಾವಳಿ ಹಬ್ಬಕ್ಕೆ ವಿಶೇಷ ಸ್ಥಾನವಿದೆ. ಇದು ಕೇವಲ ದೀಪಗಳ ಹಬ್ಬವಲ್ಲ, ನಮ್ಮ ಪೂರ್ವಜರು ತಲೆಮಾರುಗಳಿಂದ ಉಳಿಸಿಕೊಂಡು ಬಂದಿರುವ ಸಂಸ್ಕೃತಿ, ಸಂಪ್ರದಾಯ, ಭಕ್ತಿ, ಸಹೋದರತ್ವ ಮತ್ತು ಸಾಮೂಹಿಕ ಜೀವನದ ಪ್ರತಿಬಿಂಬವಾಗಿದೆ ಎಂದು ಪುರಸಭೆ ಸ್ಥಾಯಿ ಸಮಿತಿ ಮಾಜಿ ಅಧ್ಯಕ್ಷ ಜಗದೀಶ್ ಚವ್ಹಾಣ ಹೇಳಿದರು.
ಲಕ್ಷ್ಮಿ ಹಬ್ಬದ ದಿನದಂದು ಯುವತಿಯರು ನಾಗವೇಲಾಂಬಿಕಾ ದೇವಸ್ಥಾನದ ಸುತ್ತಮುತ್ತಲಿನ ಪ್ರಕೃತಿ ಮತ್ತು ಕಾಡು ಪ್ರದೇಶಗಳಿಗೆ ತೆರಳಿ ಲಕ್ಷ್ಮಿ ಪೂಜೆಗೆ ಬೇಕಾದ ಹೂವುಗಳನ್ನು ಸಂಗ್ರಹಿಸುತ್ತಾರೆ. ನಂತರ ದೇವಸ್ಥಾನದ ಆವರಣದಲ್ಲಿ ಸಾಂಪ್ರದಾಯಿಕ ನೃತ್ಯಗಳು, ಜನಪದ ಹಾಡುಗಳು ಮತ್ತು ಜಾನಪದ ಗೀತೆಗಳ ಮೂಲಕ ಸಾಂಸ್ಕೃತಿಕ ಸಂಭ್ರಮವನ್ನು ಆಚರಿಸುತ್ತಾರೆ. ಬಳಿಕ ನಾಗವೇಲಾಂಬಿಕಾ ದೇವಸ್ಥಾನದಲ್ಲಿ ಪೂಜೆ ಪುನಸ್ಕಾರಗಳನ್ನು ನೆರವೇರಿಸುತ್ತಾರೆ ಎಂದು ಮಾಹಿತಿ ನೀಡಿದರು.
ಇದರ ನಂತರ ಯುವತಿಯರು ಮನೆಮನೆಗೆ ತೆರಳಿ ಗೋಮಯದಿಂದ ಲಕ್ಷ್ಮಿಯ ಪ್ರತೀಕವನ್ನು ರೂಪಿಸಿ, ಅದರ ಮೇಲೆ ಹೂವುಗಳನ್ನು ಇಟ್ಟು ಪೂಜಿಸುತ್ತಾರೆ. ಈ ಸಂದರ್ಭದಲ್ಲಿ ಪ್ರತಿಯೊಂದು ಮನೆಯ ಸಹೋದರರಿಗೆ ಮತ್ತು ಕುಟುಂಬದವರಿಗೆ ಒಳಿತಾಗಲಿ ಎಂದು ಆಶೀರ್ವಚನದ ರೂಪದಲ್ಲಿ ವಿಶೇಷ ಜನಪದ ಹಾಡುಗಳನ್ನು ಹಾಡುತ್ತಾರೆ. ಇಂತಹ ಹಾರೈಕೆಗಳೊಂದಿಗೆ ಹೂವುಗಳನ್ನು ಅರ್ಪಿಸಿ, ಹಾಡುಗಳನ್ನು ಹಾಡುವ ಮೂಲಕ ಯುವತಿಯರು ಸಹೋದರತ್ವ, ಪ್ರೀತಿ, ಗೌರವ ಮತ್ತು ಕುಟುಂಬದ ಬಾಂಧವ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತಾರೆ
ದಸರಾ ಹಬ್ಬ ಮುಗಿದ ನಂತರ ದೀಪಾವಳಿ ಹಬ್ಬದವರೆಗೆ ಬಂಜಾರ ಸಮಾಜದ ಯುವತಿಯರು ಪ್ರತಿದಿನ ತಮ್ಮ ತಾಂಡಾದ ನಾಯಕರ ಮನೆಗಳ ಮುಂದೆ ಸಾಂಪ್ರದಾಯಿಕ ಉಡುಗೆ ತೊಟ್ಟು, ನಮ್ಮ ಜನಪದ ಸಂಸ್ಕೃತಿಯನ್ನು ಬಿಂಬಿಸುವ ನೃತ್ಯಗಳನ್ನು ಪ್ರದರ್ಶಿಸುತ್ತಾರೆ. ಹಾಡು, ನೃತ್ಯ ಮತ್ತು ಸಂಭ್ರಮದ ಮೂಲಕ ಹಬ್ಬದ ವಾತಾವರಣವನ್ನು ಸೃಷ್ಟಿಸುತ್ತಾರೆ.
ನಂತರ ಕಾಳಿಮಾಸದ ವಿಶೇಷ ದಿನದಂದು ಇಡೀ ಸ್ಟೇಷನ್ ತಾಂಡಾ ಸೇರಿದಂತೆ ಸುತ್ತಮುತ್ತಲಿನ ಬಂಜಾರ ತಾಂಡಾಗಳ ಯುವತಿಯರು ಮನೆಮನೆಗೆ ತೆರಳಿ ಆರತಿ ಬೆಳಗುವ ಮೂಲಕ ಈ ಹಬ್ಬವನ್ನು ಆಚರಿಸುತ್ತಾರೆ. ಪ್ರತಿಯೊಂದು ಮನೆಯ ಮುಂದೆ ಆರತಿ ಬೆಳಗುವ ಈ ಸಂಪ್ರದಾಯವು ಕತ್ತಲಿನಿಂದ ಬೆಳಕಿನೆಡೆಗೆ ಸಾಗುವ ಜೀವನದ ಸಂದೇಶವನ್ನು ಸಾರುತ್ತದೆ. ಪ್ರತಿಯೊಂದು ಮನೆಯಲ್ಲೂ ಸುಖ, ಶಾಂತಿ, ಸಮೃದ್ಧಿ ಮತ್ತು ನೆಮ್ಮದಿ ನೆಲೆಸಲಿ ಎಂಬ ಆಶಯ ಇದರ ಹಿಂದಿದೆ.
ಗೋವುಗಳ ಆರಾಧನೆ – ನಮ್ಮ ಸಂಸ್ಕೃತಿಯ ವಿಶೇಷತೆ:
ಬಂಜಾರ ಸಮಾಜವು ಗೋವುಗಳನ್ನು ಪೂಜಿಸುವ, ಗೌರವಿಸುವ ಮತ್ತು ಗೋಮಾತೆಯನ್ನು ಲಕ್ಷ್ಮಿಯ ಸ್ವರೂಪವೆಂದು ಕಾಣುವ ಸಂಪ್ರದಾಯವನ್ನು ಹೊಂದಿದೆ. ಶ್ರೀಕೃಷ್ಣನು ಗೋವುಗಳ ರಕ್ಷಣೆ ಮತ್ತು ಗೋವರ್ಧನ ಪೂಜೆಯ ಮೂಲಕ ಸಾರಿದ ಸಂದೇಶಕ್ಕೂ ನಮ್ಮ ಸಂಸ್ಕೃತಿಯಲ್ಲಿ ವಿಶೇಷ ಮಹತ್ವವಿದೆ.
ಆಧುನಿಕ ಯುಗದಲ್ಲೂ ಅಳಿಯದ ಬಂಜಾರ ಸಂಸ್ಕೃತಿ:
ಇಂದಿನ ಆಧುನಿಕ ಕಂಪ್ಯೂಟರ್ ಯುಗದಲ್ಲಿ ಬಂಜಾರ ಸಮಾಜದ ಅನೇಕ ಯುವಕರು ಹಾಗೂ ಯುವತಿಯರು ಉನ್ನತ ಶಿಕ್ಷಣ ಪಡೆದು ವಿಜ್ಞಾನಿಗಳು, ವೈದ್ಯರು, ಇಂಜಿನಿಯರ್‌ಗಳು ಹಾಗೂ ವಿವಿಧ ಉನ್ನತ ಹುದ್ದೆಗಳಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಆದರೂ ತಮ್ಮ ವಿದ್ಯಾಭ್ಯಾಸ, ಉದ್ಯೋಗ ಮತ್ತು ಸಾಮಾಜಿಕ ಸ್ಥಾನಮಾನಗಳನ್ನು ಮೀರಿ ತಮ್ಮ ಪೂರ್ವಜರು ಆಚರಿಸಿಕೊಂಡು ಬಂದಿರುವ ಈ ಸಂಪ್ರದಾಯವನ್ನು ಮರೆಯದೆ ಇಂದಿಗೂ ಅದೇ ಭಕ್ತಿ, ಶ್ರದ್ಧೆ ಮತ್ತು ಸಂಭ್ರಮದಿಂದ ಆಚರಿಸುತ್ತಿರುವುದು ನಿಜಕ್ಕೂ ಹೆಮ್ಮೆಯ ಸಂಗತಿ ಎಂದು ಹೇಳಿದರು.
ಈ ಹಬ್ಬದಲ್ಲಿ ಬಡವ-ಶ್ರೀಮಂತ, ವಿದ್ಯಾವಂತ-ಅವಿದ್ಯಾವಂತ ಎಂಬ ಯಾವುದೇ ಭೇದಭಾವವಿಲ್ಲ. ಎಲ್ಲರೂ ಒಂದಾಗಿ, ಕುಟುಂಬ ಸಮೇತರಾಗಿ, ತಾಂಡಾದ ನಾಯಕರು, ಹಿರಿಯರು, ಯುವಕರು, ಯುವತಿಯರು ಹಾಗೂ ತಾಯಂದಿರು ಒಗ್ಗಟ್ಟಿನಿಂದ ಭಾಗವಹಿಸುವುದು ಈ ಹಬ್ಬದ ನಿಜವಾದ ಸೌಂದರ್ಯವಾಗಿದೆ ಎಂದು ತಿಳಿಸಿದರು.
ನಮ್ಮ ಪೂರ್ವಜರು ನಮಗೆ ಕೇವಲ ಒಂದು ಹಬ್ಬವನ್ನು ಬಿಟ್ಟು ಹೋಗಿಲ್ಲ, ಬದಲಾಗಿ ನಮ್ಮ ಅಸ್ಮಿತೆ, ನಮ್ಮ ಸಂಸ್ಕೃತಿ, ನಮ್ಮ ಪರಂಪರೆ ಮತ್ತು ನಮ್ಮ ಮುಂದಿನ ಪೀಳಿಗೆಗೆ ದಾರಿದೀಪವಾಗುವಂತಹ ಅಮೂಲ್ಯವಾದ ಸಾಂಸ್ಕೃತಿಕ ಆಸ್ತಿಯನ್ನು ನೀಡಿದ್ದಾರೆ. ಆ ಪರಂಪರೆಯನ್ನು ಇಂದಿನ ಯುವ ಪೀಳಿಗೆಯೂ ಅಷ್ಟೇ ಪ್ರೀತಿ ಮತ್ತು ಗೌರವದಿಂದ ಮುಂದುವರಿಸಿಕೊಂಡು ಹೋಗುತ್ತಿರುವುದು ನಮ್ಮೆಲ್ಲರ ಹೆಮ್ಮೆಯ ವಿಷಯವಾಗಿದೆ. ನಮ್ಮ ಸಂಸ್ಕೃತಿಯೇ ನಮ್ಮ ಅಸ್ಮಿತೆ, ನಮ್ಮ ಪರಂಪರೆಯೇ ನಮ್ಮ ಹೆಮ್ಮೆ ಎಂದು ಹೇಳಿದರು.
ಈ ಸಂದರ್ಭದಲ್ಲಿ ಅನಿಲ್ ಕುಮಾರ್ ಪವಾರ್ (ಸಂಶೋಧಕ ವಿಜ್ಞಾನಿ), ವಿಶ್ವನಾಥ್ ರಾಠೋಡ, ಪಾಂಡು ರಾಠೋಡ, ಶ್ರೀಕಾಂತ್ ರಾಠೋಡ, ಸಾಗರ್ ಚವ್ಹಾಣ, ಮನೋಹರ್ ಚವ್ಹಾಣ, ಜಗದೀಶ್ ಪವಾರ್, ಪ್ರೇಮ್ ರಾಠೋಡ, ರಾಜು ಚವ್ಹಾಣ ಸೇರಿದಂತೆ ಅನೇಕ ಗಣ್ಯರು ಹಾಗೂ ಸಮಾಜದ ಮುಖಂಡರು ಉಪಸ್ಥಿತರಿದ್ದರು.