ಅಲೆಮಾರಿ ಸಮುದಾಯದ ಧ್ವನಿಯಾಗಿದ್ದ ಮಾರುತಿ ಸಿರವಾಟಿ ನಿಧನ, ಹಲವರು ಸಂತಾಪ 

ಅಲೆಮಾರಿ ಸಮುದಾಯದ ಧ್ವನಿಯಾಗಿದ್ದ ಮಾರುತಿ ಸಿರವಾಟಿ ನಿಧನ, ಹಲವರು ಸಂತಾಪ 

ನಾಗಾವಿ ಎಕ್ಸಪ್ರೆಸ್

ಚಿತ್ತಾಪುರ: ಕರ್ನಾಟಕ ರಾಜ್ಯ ಅಲೆಮಾರಿ ಪರಿಶಿಷ್ಟ ಜಾತಿ, ಬುಡ್ಗ ಜಂಗಮ ಸಮುದಾಯದ ರಾಜ್ಯ ಉಪಾಧ್ಯಕ್ಷ ಮಾರುತಿ ಸಿರವಾಟಿ ಚಿತ್ತಾಪುರ (43) ಅವರು ಗುರುವಾರ ಸಂಜೆ ರಾವೂರ ರಸ್ತೆಯಲ್ಲಿ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಅಕಾಲಿಕ ಮರಣ ಹೊಂದಿರುವುದು ಇಡೀ ಸಮುದಾಯಕ್ಕೆ ಬರಸಿಡಿಲು ಬಡಿದಂತಾಗಿದೆ.

ಶಹಾಬಾದ್‌ನಲ್ಲಿ ಅಂತ್ಯಕ್ರಿಯೆ ಕಾರ್ಯಕ್ರಮವನ್ನು ಮುಗಿಸಿ ಹಿಂತಿರುಗುತ್ತಿದ್ದ ವೇಳೆ ಮರಳು ಸಾಗಿಸುವ ಟಿಪ್ಪರ್ ವಾಹನ ಡಿಕ್ಕಿ ಹೊಡೆದ ಪರಿಣಾಮ ಈ ದುರ್ಘಟನೆ ಸಂಭವಿಸಿದೆ.

ನಿಸ್ವಾರ್ಥ ಸೇವೆಯ 25 ವರ್ಷಗಳ ಪಯಣ:

ಕಳೆದ ಸುಮಾರು 25 ವರ್ಷಗಳಿಂದ ಹಗಲಿರುಳು ಎನ್ನದೇ ತಮ್ಮ ಇಡೀ ಜೀವನವನ್ನು ಬುಡ್ಗ ಜಂಗಮ ಹಾಗೂ ಸಮಸ್ತ ಅಲೆಮಾರಿ ಸಮುದಾಯಗಳ ಏಳಿಗೆಗಾಗಿ ಮುಡಿಪಾಗಿಟ್ಟಿದ್ದ ಮಾರುತಿ ಅವರು ನಿಜವಾದ ಜನನಾಯಕರಾಗಿದ್ದರು.

ತನಗಾಗಿ ಏನನ್ನೂ ಮಾಡಿಕೊಳ್ಳದೆ, ಕೇವಲ ಸಮಾಜದ ಒಳಿತಿಗಾಗಿ ಬದುಕಿದ ಅಪರೂಪದ ವ್ಯಕ್ತಿತ್ವ ಇವರದ್ದಾಗಿತ್ತು. ತಮ್ಮ ಸ್ವಂತ ಊರಿನಲ್ಲಿ ಬಡವರಿಗಾಗಿ ಸುಮಾರು 40 ನಿವೇಶನ ಹಾಗೂ ವಸತಿ ಮನೆಗಳನ್ನು ನಿರ್ಮಿಸಿಕೊಡುವ ಮೂಲಕ ಸೂರು ಇಲ್ಲದವರ ಬಾಳಿಗೆ ಬೆಳಕಾಗಿದ್ದರು.

‘ಕನ್ನಡ ಕಲಾವೇದಿಕೆ’ಯ ಮೂಲಕ ಅಲೆಮಾರಿಗಳ ಧ್ವನಿಯಾದರು:

ಕೇವಲ ಸಂಘಟನೆಗೆ ಸೀಮಿತವಾಗದೆ, “ಕನ್ನಡ ಕಲಾವೇದಿಕೆ” ಎಂಬ ಯೂಟ್ಯೂಬ್ ಚಾನೆಲ್ ಆರಂಭಿಸಿ, ಇಡೀ ದೇಶಾದ್ಯಂತ ಸಂಚರಿಸಿ ಅಲೆಮಾರಿ ಸಮುದಾಯಗಳು ಎದುರಿಸುತ್ತಿರುವ ನೋವು, ಸಂಕಷ್ಟ ಮತ್ತು ಮೂಲಭೂತ ಸಮಸ್ಯೆಗಳನ್ನು ಸರ್ಕಾರದ ಗಮನಕ್ಕೆ ತರುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

ಕಲೆ, ಸಂಸ್ಕೃತಿ ಹಾಗೂ ಜನರ ಧ್ವನಿಯಾಗಿ ಕೆಲಸ ಮಾಡುತ್ತಾ, ಅಲೆಮಾರಿಗಳಿಗೆ ಸರ್ಕಾರದ ಸೌಲಭ್ಯಗಳು ದೊರಕುವಂತೆ ಮಾಡಲು ಕಾರಣೀಭೂತರಾಗಿದ್ದರು.

ಸಮುದಾಯಕ್ಕೆ ತುಂಬಲಾರದ ನಷ್ಟ:

ಸದಾ ನಗುನಗುತ್ತಾ ಎಲ್ಲರೊಂದಿಗೆ ಬೆರೆಯುತ್ತಿದ್ದ, ಎಲ್ಲರನ್ನೂ ಪ್ರೀತಿಸುತ್ತಿದ್ದ ಅಜಾತಶತ್ರು ಮಾರುತಿ ಅವರು ಇಂದು ನಮ್ಮನ್ನಗಲಿದ್ದಾರೆ ಎಂಬ ಕಹಿಸತ್ಯವನ್ನು ಯಾರಿಂದಲೂ ನಂಬಲು ಸಾಧ್ಯವಾಗುತ್ತಿಲ್ಲ.

ಸಮುದಾಯಕ್ಕೆ ಯಾವುದೇ ಅನ್ಯಾಯವಾಗದಂತೆ ಸದಾ ಮುಂದೆ ನಿಂತು ಹೋರಾಡುತ್ತಿದ್ದ ಒಬ್ಬ ದಿಟ್ಟ ಹೋರಾಟಗಾರನನ್ನು ಕಳೆದುಕೊಂಡು ಇಂದು ಇಡೀ ಬುಡ್ಗ ಜಂಗಮ ಸಮುದಾಯ ತಬ್ಬಲಿಯಾಗಿದೆ. ಇವರ ಅಗಲಿಕೆ ಇಡೀ ಅಲೆಮಾರಿ ಸಮಾಜಕ್ಕೆ ತುಂಬಲಾರದ ನಷ್ಟವಾಗಿದೆ.

ಮೃತರ ಆತ್ಮಕ್ಕೆ ಭಗವಂತನು ಚಿರಶಾಂತಿ ನೀಡಲಿ ಹಾಗೂ ಈ ದುಃಖವನ್ನು ಭರಿಸುವ ಶಕ್ತಿಯನ್ನು ಅವರ ಕುಟುಂಬ ಸದಸ್ಯರಿಗೆ ಮತ್ತು ಅಭಿಮಾನಿಗಳಿಗೆ ಕರುಣಿಸಲಿ ಎಂದು ಸಮಾಜದ ರಾಜ್ಯಾಧ್ಯಕ್ಷ ಸಣ್ಣ ಮಾರೆಪ್ಪ, ರಾಜ್ಯ ಪ್ರಧಾನ ಕಾರ್ಯದರ್ಶಿ ಶಿವರಾಜ್ ರುದ್ರಾಕ್ಷಿ, ಜಿಲ್ಲಾಧ್ಯಕ್ಷ ಪಂಡಿತ್ ಸಿರವಾಟಿ ಹಾಗೂ ರಾಜ್ಯದ ಎಲ್ಲಾ ಬುಡ್ಗ ಜಂಗಮ ಸಮುದಾಯದ ಪದಾಧಿಕಾರಿಗಳು, ಬಿಜೆಪಿ ಮುಖಂಡರಾದ ಅಯ್ಯಪ್ಪ ರಾಮತೀರ್ಥ, ಮಲ್ಲಿಕಾರ್ಜುನ ಎಮ್ಮೆನೋರ, ಕಾಂಗ್ರೆಸ್ ಮುಖಂಡರಾದ ನಾಗರೆಡ್ಡಿ ಪಾಟೀಲ್ ಕರದಾಳ, ಅರವಿಂದ ಚವ್ಹಾಣ, ಸುಭಾಷ್ ಜಾಧವ್ ಅವರು ತೀವ್ರ ಸಂತಾಪ ಮತ್ತು ವಿಷಾದ ವ್ಯಕ್ತಪಡಿಸಿದ್ದಾರೆ.