ಸಾರ್ಥಕ ಶ್ರಾವಣದ ಪರಮಾರ್ಥ | ಶ್ರವಣದಿಂದ ಜ್ಞಾನ, ಜ್ಞಾನದಿಂದ ಮುಕ್ತಿ: ಸೂಗೂರೇಶ್ವರ ಸ್ವಾಮಿ
ನಾಗಾವಿ ಎಕ್ಸಪ್ರೆಸ್
ಕಲಬುರಗಿ: ಶ್ರಾವಣ ಮಾಸವು ಕೇವಲ ಧಾರ್ಮಿಕ ಆಚರಣೆಗಳು, ಪೂಜೆ–ಪುನಸ್ಕಾರಗಳಿಗೆ ಸೀಮಿತವಾದ ಮಾಸವಲ್ಲ. ಇದರ ಹಿಂದೆ ಆಳವಾದ ಆಧ್ಯಾತ್ಮಿಕ ಹಾಗೂ ಪಾರಮಾರ್ಥಿಕ ತತ್ವ ಅಡಗಿದೆ. ‘ಶ್ರಾವಣ’ ಎಂಬ ಪದವೇ ‘ಶ್ರವಣ’ವನ್ನು ಸೂಚಿಸುತ್ತದೆ. ಅಂದರೆ ಸತ್ಯವನ್ನು ಆಲಿಸುವುದು, ಗುರುಮುಖದಿಂದ ಜ್ಞಾನವನ್ನು ಪಡೆಯುವುದು ಹಾಗೂ ಆ ಜ್ಞಾನವನ್ನು ಮನನ–ನಿಧಿಧ್ಯಾಸನದ ಮೂಲಕ ಆತ್ಮಸಾಕ್ಷಾತ್ಕಾರವಾಗಿ ಪರಿವರ್ತಿಸಿಕೊಳ್ಳುವುದು ಎಂಬ ಅರ್ಥವನ್ನು ಹೊಂದಿದೆ ಎಂದು ಗುಬ್ಬಿ ಕಾಲೋನಿಯ ಶ್ರೀ ವೇ. ಮೂ. ಸೂಗೂರೇಶ್ವರ ಸ್ವಾಮಿ ಹಿರೇಮಠ ತಿಳಿಸಿದ್ದಾರೆ.
ಶ್ರಾವಣ ಎಂಬ ಪದದ ಪಾರಮಾರ್ಥಿಕ ಅರ್ಥವನ್ನು ಅರಿಯಬೇಕಾದರೆ ‘ಶ್ರವಣ’ದ ಮಹತ್ವವನ್ನು ತಿಳಿದುಕೊಳ್ಳಬೇಕು. ಮನುಷ್ಯನ ಬುದ್ಧಿ ಅಜ್ಞಾನ, ಅಶುದ್ಧ ಚಿಂತನೆ ಹಾಗೂ ಭೌತಿಕ ಆಸಕ್ತಿಗಳಿಂದ ಆವೃತವಾಗಿರುತ್ತದೆ. ಗುರುಮುಖದಿಂದ ಉಪನಿಷತ್ ವಾಕ್ಯಗಳು, ತತ್ವಜ್ಞಾನ ಹಾಗೂ ಪರಮಾತ್ಮನ ಸ್ವರೂಪವನ್ನು ಶ್ರವಣ ಮಾಡುವುದರಿಂದ ಬುದ್ಧಿ ಶುದ್ಧವಾಗುತ್ತದೆ. ಸತ್ಯದ ಅರಿವು ಮೂಡಿದಾಗ ‘ನಾನು’ ಎಂಬ ಅಹಂಭಾವದ ಬದಲು ‘ನಾನು ಪರಮಾತ್ಮನ ಸ್ವರೂಪ’ ಎಂಬ ಜ್ಞಾನ ಸ್ಥಿರವಾಗುತ್ತದೆ.
ಶ್ರವಣ, ಮನನ ಮತ್ತು ನಿಧಿಧ್ಯಾಸನವು ಆತ್ಮಜ್ಞಾನದ ಪ್ರಮುಖ ಹಂತಗಳಾಗಿವೆ. ಮೊದಲಿಗೆ ಗುರುಗಳಿಂದ ತತ್ವವನ್ನು ಶ್ರವಣ ಮಾಡಬೇಕು. ನಂತರ ಕೇಳಿದ ವಿಷಯವನ್ನು ಆಳವಾಗಿ ಮನನ ಮಾಡಬೇಕು. ಆ ಬಳಿಕ ಅದೇ ಸತ್ಯದಲ್ಲಿ ನಿರಂತರವಾಗಿ ಚಿಂತನೆ ಹಾಗೂ ಧ್ಯಾನ ನಡೆಸುವುದೇ ನಿಧಿಧ್ಯಾಸನ. ಈ ಸಾಧನೆಯ ಪರಿಪಕ್ವತೆಯಲ್ಲಿ ಸಮಾಧಿ ಸ್ಥಿತಿ ಉಂಟಾಗಿ ಆತ್ಮಜ್ಞಾನದ ಅನುಭವ ಸಾಧ್ಯವಾಗುತ್ತದೆ. ಇದೇ ಮುಕ್ತಿಯ ಮಾರ್ಗವಾಗಿದೆ.
ಜೀವ ಮತ್ತು ಶಿವರ ಐಕ್ಯತೆಯನ್ನು ವಿವರಿಸಲು ಸ್ವಾಮೀಜಿ ಅವರು ಪ್ರಕೃತಿಯ ಸುಂದರ ಉದಾಹರಣೆಗಳನ್ನು ನೀಡಿದ್ದಾರೆ. ಆಕಾಶದ ನೀಲಿಯು ಆಕಾಶದಲ್ಲೇ ಬೆರೆತಿರುವಂತೆ, ಜಲಬಿಂದು ಸಾಗರದಲ್ಲಿ ಲೀನವಾದಂತೆ, ಜೀವನು ಪರಬ್ರಹ್ಮನಲ್ಲಿ ಲೀನವಾಗುತ್ತಾನೆ. ಈ ಐಕ್ಯತೆಯ ಅನುಭವದಿಂದ ದುಃಖದ ನಿವೃತ್ತಿ ಹಾಗೂ ಪರಮಾನಂದದ ಪ್ರಾಪ್ತಿ ಸಾಧ್ಯವಾಗುತ್ತದೆ.
ಶ್ರವಣಕ್ಕೆ ಇಷ್ಟೊಂದು ಮಹತ್ವ ನೀಡಿರುವುದರಿಂದಲೇ ‘ಶ್ರಾವಣ’ ಮಾಸವು ಆಧ್ಯಾತ್ಮಿಕವಾಗಿ ವಿಶೇಷ ಮಹತ್ವವನ್ನು ಪಡೆದಿದೆ. ಕೇವಲ ಹೊರಗಿನ ಆಚರಣೆಗಳಿಗಿಂತ ಒಳಗಿನ ಶುದ್ಧೀಕರಣ, ತತ್ವಚಿಂತನೆ ಹಾಗೂ ಆತ್ಮಜ್ಞಾನದ ಅರಿವಿಗೆ ಈ ಮಾಸವನ್ನು ಬಳಸಿಕೊಳ್ಳಬೇಕು. ಭಕ್ತಿ ಮತ್ತು ಜ್ಞಾನ ಎರಡನ್ನೂ ಸಮನ್ವಯಗೊಳಿಸಿ ಜೀವನವನ್ನು ಸಾರ್ಥಕಗೊಳಿಸುವ ಅವಕಾಶವೇ ಶ್ರಾವಣ ಮಾಸವಾಗಿದೆ.
ಆದ್ದರಿಂದ ಶ್ರಾವಣವು ಕೇವಲ ಒಂದು ಕಾಲಮಾನವಲ್ಲ, ಶ್ರವಣದಿಂದ ಮನನಕ್ಕೆ, ಮನನದಿಂದ ನಿಧಿಧ್ಯಾಸನಕ್ಕೆ, ನಿಧಿಧ್ಯಾಸನದಿಂದ ಆತ್ಮಜ್ಞಾನಕ್ಕೆ ಹಾಗೂ ಆತ್ಮಜ್ಞಾನದಿಂದ ಮುಕ್ತಿಯೆಡೆಗೆ ಕರೆದೊಯ್ಯುವ ಆಧ್ಯಾತ್ಮಿಕ ಪಯಣವಾಗಿದೆ. ‘ಶ್ರಾವಣ’ದಲ್ಲಿರುವ ‘ಶ್ರವಣ’ ಪದವೇ ಮನುಷ್ಯನಿಗೆ ಜ್ಞಾನ ಮತ್ತು ಮೋಕ್ಷದ ಮಾರ್ಗವನ್ನು ಸೂಚಿಸುತ್ತದೆ. ಈ ಪಾರಮಾರ್ಥಿಕ ಸಂದೇಶವನ್ನು ಅರಿತು ಶ್ರಾವಣ ಮಾಸವನ್ನು ಸಾರ್ಥಕವಾಗಿ ಆಚರಿಸುವುದು ಪ್ರತಿಯೊಬ್ಬರ ಕರ್ತವ್ಯವಾಗಿದೆ ಎಂದು ವೇದ ಮೂರ್ತಿ ಸೂಗೂರೇಶ್ವರ ಸ್ವಾಮಿ ಅವರು ತಿಳಿಸಿದ್ದಾರೆ.